“Xalq Birliyinin Tarixi Günü – 17 Noyabr”

Azərbaycan tarixində elə günlər var ki, onlar milli yaddaşımızda dönməz dönüş nöqtəsi kimi əbədiləşib. 17 Noyabr – Milli Dirçəliş Günü də həmin taleyüklü günlər sırasında xüsusi yer tutur. 1988-ci ildə Azadlıq meydanında başlayan böyük xalq hərəkatı təkcə bir etiraz dalğası deyil, milli ruhun canlanması, azərbaycanlıların öz gələcəyinə sahib çıxmaq əzminin təntənəsi idi.

O illərdə Sovet hakimiyyətinin sərt siyasi təzyiqləri altında yaşayan xalqımız hüquqlarının pozulmasına susmadı. Minlərlə vətəndaşın toplandığı Azadlıq meydanı azadlıq ideyalarının ocağına çevrildi. Bu meydan insanların tək yumruq kimi birləşdiyi, milli kimlik duyğusunun gücləndiyi və istiqlaliyyət düşüncəsinin yenidən oyanıb alovlandığı məkan oldu.

17 Noyabr hadisələri sonrakı tarixi proseslərin – 1990-cı il Yanvar faciəsinin, suverenlik haqqında Konstitusiya aktının qəbulunun və nəhayət 1991-ci il dövlət müstəqilliyimizin bərpasının ideya təməlini qoydu. Bu gün, həmin günlərin siyasi-mənəvi irsi müstəqil Azərbaycanın gücündə, sabitliyində və inkişaf yolunda öz parlaq təzahürünü tapır.

Ulu Öndər Heydər Əliyev bu günün əhəmiyyətinə yüksək qiymət verərək bildirirdi ki, 17 Noyabr hadisələri xalqın mübarizə ruhunu oyatdı, milli birliyi gücləndirdi və dövlətçilik yolunda dönüş yaratdı. Bugünkü Azərbaycan məhz həmin o dirçəliş əzminin davamı və mükafatıdır.

Bu gün biz Milli Dirçəliş Gününü yalnız bir tarixi xatirə kimi deyil, milli həmrəyliyin, dövlətçilik düşüncəsinin və azadlıq arzusunun rəmzi kimi qeyd edirik. Azərbaycan xalqı bu irsdən güc alaraq daha güclü sabahlar qurmaq üçün səylərini daim artırır.

17 Noyabr – xalqımızın milli oyanışının, gücünün, birlik ruhunun və azadlıq iradəsinin təntənəsidir.

Bərdə Şəhər Şəhid Alı adına 5 nömrəli tam orta məktəbin direktoruTeymur Həmidov.