Aktiv turizm mövsümü bitir, hindistanlı turistlər azalıb avropalılar artıb
Dövlət Turizm Agentliyinin Qoruqları İdarəetmə Mərkəzi İdarə Heyətinin sədri Murad Ağabəyli Musavat.com-a açıqlamasında Abşeron yarımadasında həyata keçirilən pilot layihədən danışıb.
Murad Ağabəyli bildirib ki, yay mövsümünün əvvəlindən turistlərin çoxsaylı müraciətləri əsasında çimərliklərdə monitorinqlər aparılıb: “Nəticədə bəzi çimərliklərdə sanitar-gigiyenik vəziyyətin qənaətbəxş olmadığı, minimal infrastrukturun isə çatışmadığı müəyyən edildi. Problemin həlli məqsədilə pilot layihə hazırlanaraq işlərə start verildi”.
Onun sözlərinə görə, layihə çərçivəsində Şüvəlan ərazisində iki çimərlik birləşdirilərək üç yeni ictimai çimərlik istifadəyə verilib: “Ərazidə əvvəlki nizamsız tikililər söküldü, müasir infrastruktur quruldu. İndi burada avtodayanacaq,
Dövlət Turizm Agentliyi sədrinin müşaviri Kənan Quluzadə Musavat.com-a açıqlamasında bildirib ki, Azərbaycanda yay turizm mövsümü ənənəvi olaraq 15 iyunda başlayır və 10 sentyabradək davam edir və artıq ilkin nəticələr daxili turizmdə artım olduğunu göstərir: “Ötən il ölkə üzrə daxili səfərlərin sayı 23 milyon təşkil edib. Bu il isə ilin sonunadək rəqəmin 25 milyona çatacağı proqnozlaşdırılır. Onun təxminən 40 faizi səfər yay mövsümünə təsadüf edir”.
Kənan Quluzadə bildirib ki, iyulun sonunadək Azərbaycana 1 milyon 478 min xarici vətəndaş səfər edib. Avqust göstəriciləri ilə bu rəqəmin 1 milyon 700 mini keçəcəyi gözlənilir. Lakin ötən illə müqayisədə təxminən 2 faiz azalma müşahidə olunub:
“Əsasən Rusiya və Hindistandan gələn turistlərin sayında azalma qeydə alınıb. Rusiyadan gələnlərin sayı təxminən 12–14 faiz azalıb. Hindistandan isə məlum regional səbəblər təsir edib. Əvəzində Orta Asiya, Qərbi və Şərqi Avropa, habelə Pakistan və Çin bazarlarından gələn turistlərin sayında artım var. Xüsusilə Çin bazarı Azərbaycan üçün prioritet elan olunub və bu istiqamətdə 100-ə yaxın kadr təlimə cəlb olunub”.
O əlavə edib ki, Körfəz ölkələri, İsrail və Türkiyədən gələn turistlərin sayında da artım müşahidə olunub. Ümumilikdə isə 2019-cu ilin rekord göstəricilərinə yaxın nəticələr əldə olunub:
“Həmin il Azərbaycana 3,2 milyon xarici turist gəlmişdi. Hazırda rəqəmlər bir qədər aşağı olsa da, əldə olunan gəlir və yaradılan iş yerləri baxımından vəziyyət rekord ilə eyni səviyyədədir”.
Sultan Məmmədli, Musavat.com