Hörmətli tərtərlilər, əziz həmvətənlər! Sizi xalqımızın zəngin milli-mənəvi irsini, qədim adət-ənənələrini və əbədiyaşar dəyərlərini yaşadan müqəddəs Novruz bayramı münasibətilə ürəkdən təbrik edir, hər birinizə ən xoş arzularımı çatdırıram.Novruz bayramı təbiətin oyanışı, həyatın yenilənməsi, ümidlərin cücərməsi deməkdir. Bu müqəddəs bayram əsrlər boyu xalqımızın yaddaşında qorunub saxlanılmış, nəsildən-nəslə ötürülərək bu günümüzə qədər gəlib çatmışdır. Novruzun hər bir atributu – yanan tonqallar, səməni, bayram süfrələri, el şənlikləri – xalqımızın birliyinin, mehribanlığının və sarsılmaz ruhunun rəmzidir.Bu əziz günlərdə hər bir ocaqda sevincin, səmimiyyətin və qarşılıqlı hörmətin hökm sürməsi ən böyük arzumdur. Qoy bayram tonqallarının alovu hər evə istilik, hər ürəyə işıq və inam bəxş etsin. Novruzun saf nəfəsi həyatınıza yeni başlanğıclar, uğurlar və xoş dəyişikliklər gətirsin.Tərtər rayonu hər zaman öz zəhmətkeşliyi, vətənpərvərliyi və dözümlülüyü ilə seçilən insanları ilə qürur duyub. Rayonumuzun hərtərəfli inkişafı, abadlıq-quruculuq işlərinin geniş vüsət alması və əhalinin sosial rifahının yüksəldilməsi istiqamətində həyata keçirilən tədbirlərdə sizin fəal iştirakınız xüsusi əhəmiyyət daşıyır. Sizin bu etimadınız və dəstəyiniz bizim üçün ən böyük dayağımızdır. İnanıram ki, birliyimiz və həmrəyliyimiz sayəsində Tərtər daha da inkişaf edəcək, daha gözəl və firavan diyara çevriləcəkdir.Bu bayram günlərində şəhid ailələrinə və qazilərimizə xüsusi ehtiram və minnətdarlığımı bildirir, onların göstərdiyi qəhrəmanlıq və fədakarlığın xalqımızın yaddaşında əbədi yaşayacağını vurğulayıram. Biz onların əziz xatirəsini uca tutur, ailələrinin hər zaman diqqət və qayğı ilə əhatə olunmasını özümüzə borc bilirik.Novruz həm də insanları bir araya gətirən, inciklikləri unudub mehribanlığa çağıran müqəddəs bayramdır. Qoy bu bayram münasibətilə hər evdə sevgi, hər ürəkdə mərhəmət və hər münasibətdə səmimiyyət daha da güclənsin.Bir daha hər birinizi Novruz bayramı münasibətilə ürəkdən təbrik edir, sizə möhkəm cansağlığı, uzun ömür, firavan həyat və süfrələrinizə bol ruzi-bərəkət arzulayıram. Qoy baharın gəlişi həyatınıza sevinc, qəlbinizə ümid və işlərinizə uğur gətirsin!
Hörmətlə, Müstəqim Məmmədov Tərtər Rayon İcra Hakimiyyətinin başçısı