Rəşad Dağlının həbsxanadan YENİ GÖRÜNTÜLƏRİ yayıldı – VİDEO

Meyxana sənətinin ən tanınmış simalarından biri olan Rəşad Dağlının həbsxanadan yeni görüntüləri yayılıb.

Musavat.com xəbər verir ki, sosial şəbəkələrdə paylaşılan kadrlar sənətçinin pərəstişkarlarını məyus edib.

Onun əvvəlki illərdəki enerjili və gümrah obrazından fərqli olaraq, hazırkı durumu tamaşaçılarda kədər və təəssüf hissi doğurub.

Xatırladaq ki, Rəşad Dağlı 2022-ci il noyabrın 9-da baş verən dəhşətli hadisədən sonra həbs olunub. Meyxanaçı yaşadığı ünvanda qonşusu, 1979-cu il təvəllüdlü İsgəndər Mehdiyevi avtomobilində bıçaqlayaraq qətlə yetirib. Hadisə ölkə ictimaiyyətində böyük rezonans doğurmuşdu.

İstintaqın yekununa görə, Rəşad Dağlıya qarşı Cinayət Məcəlləsinin 120.1-ci (qəsdən adam öldürmə) və 228.4-cü (qanunsuz soyuq silah gəzdirmə) maddələri üzrə ittiham irəli sürülüb.

Məhkəmə prosesi Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilib. Hökmə əsasən, meyxanaçı 9 il 6 ay müddətinə azadlıqdan məhrum edilib.

Hadisədən artıq iki ildən çox vaxt keçsə də, Rəşad Dağlı ilə bağlı yayılan hər yeni xəbər və görüntü ictimaiyyətin diqqətini cəlb etməkdə davam edir. Onun azadlıqdan sonrakı taleyi və sənət fəaliyyətinə qayıdışı barədə müzakirələr isə hələ də gündəmdədir.